Apple Dja Toma Di Sel...

Ah Steve kela go bu ka speraba...
Dja nu ka sabi ki Apple dja lansa iPhone, desdi Julhu si n ka sta inganadu, na "Unites Stais" :) UMA susésu sima n tinha previstu... :D (ma tambe bu tinha ki ser dodu pa fla ki iPhone ka ta fazeba susésu)
Nhos sabi tambe ki uniku operador ki podi vendi iPhone é AT&T na Merka. Portantu, iPhone so ta funsiona na redi di AT&T. Apple konsigi bendi serka di 500 mil iPhone ti oji... izatu... meio milion di telemovel ku es strategia... tudu kes tilifoni li na redi di AT&T. Kampion pa Apple, Kampion pa AT&T ma koitadu di kes ki sta na kes otu operador... Viva Geo!! Kuze? N ta bem splika.
Axu ki foi kuarta-fera Orange, O2 i T-Mobile 3 operadora di Europa sina ku Apple um kontratu di izklusividadi di venda di iPhone. Kuze ki operadoris ta ganha? Bom tudu alguem ki kre um iPhone tem ki ba pa es pamo é so ku kes operador li ki bu ta ativa bu iPhone. Kes ki kre iPhone ta larga ses operador atual. Apple ta ganha ku kel kontratu pamo é ixigi, imagina, 10% di tudu reseita adkiridu pa utilizadoris na iPhone (voz i dadu)... alem di kustu di tilifoni... klaru. Nada mau ka?
Go txan flau di Geo, el é um rapazinhu di 19 anu di Merka i dje krakia iPhone. Gosi li el um desblokeiu atrvez di hardware, ma si dja fazeda um... kez di software ta bem já di gangan. Kel metudu dissel pa disblokia iPhone é mostral onti au vivo na net atravez di se blog (iphonejtag.blogspot.com {na ingles})portantu meiu mundu dja sabi kuza é modi ki ta fazedu. Dja nhos sabi nton... nhos mada buska nhos iPhone. Faltanu go é so disblokia CVT...
Apple Abri kuza ...sinon dja nu odjal...
Bon Djogu!!!


Atualizason -- 24 di Agostu 23:17 ---
gentis... kuza dja sta, iPhone dja podi ser desblokiadu ku software. pontu final. Orange, O2, T-Mobile kuza é modi go? (pa verifikason bai li iPhoneSIMfree.com {na ingles})
Grandi Djogu!!!

‎ Lé Mas!

Sony vs. Hackers ... Hackers Dja Poi Mas 2

I ki golásu!!
Na mundu di djogu, Sony dja leba mas um kutan...
Hackers oji publika um bomba di deklarason. Kualker PSP (Playstation Portable), novu, bedju i posivelmenti kes futuru podi ser disblokeadu via software. É podi ti konpu un PSP ki foi danifikadu pa tentativa di krakial.
Uns tenpu atraz, si bu fazeba um atualizason ofisial di Sony (pa riba di verson 1.81) dja bu ka podia uzaba kes prugrama fetu pa komunidadi, nem djogu piratiadu.
Pa usa es novu metudu, resumidamenti, bu mesti um PSP ki dja sta desblokiadu, bu ta modifka bu bateria (imagina só, rapaz ka sta pa brinkadera) ku um software, i bu ta instala um otu software na memory stick i bu ta exekuta uns passu sima 1 2 3 na kel PSP ki bu sta ba krakia... e ... tada... Musika, filmi, djogu ... di grasa (kuasi... so falta ten kel download di CVT... ki eh $$$$) :)
Si nhos kre lé kuza é modi... mas tekniku, bai li (Na ingles):

http://www.noobz.eu/joomla/news/pandoras-battery.html/

Keli sta manda um mensáji klaru... SONY ABRI PSP!!! Si bu ka abril... ehm... dja sta dja!!!
Bon Djogu!!

‎ Lé Mas!

BitTorrent... Um idea mal interpretadu

Oji em dja nu sabi ki tudu kuza sta na Net. Filmi, djogu, prugramas di komputador, musika, livro, etc.
Ma um monti di kes kuza li eh grandi em termus di tamanhu di fixeru, as bez es ta txiga passa 4 ku 8GB. Ma nu sabi ki txeu algen tem asesu a kes tipo di fixeru li sem mutu problema. Na maiuria di bez e pamó es ta baxa kes fixeru li na Internet atrabez di um protocolo di komunikason txomadu BitTorrent.
Kuse ki é BitTorrent?
É ta trabadja na um conseitu mutu simplis. Donu di um fixeru ta partilhal, otus algen ta baxal, so ku um detalhi; Logu ki um alguem baxa um partidi kel fixeru, é ta kumesa ta partilhal. Portantu é ta kria mas disponibilidadi di kel fixeru. Purtantu, si por izemplu bu tem 10 alguem ta baxa um fixeru di 10MB, BitTorrent ta garanti ki tudu 10 ta baxa 1MB diferenti di ses kumpanheru, ker dizer ki na kel universu di kes alguem ki sta fazi kel download bu tem um fixeru kompletu. Portantu, mesmo ki kem ki tinha kel fixeru originalmenti dexa di partilha, kes 10 alguem podi kompleta kel download entri es. Um konseitu spetakular! Otu vantagi é ki kuantu mas alguen stiver ta fazi download mas rapidu bu podi kompleta bu download, pamo kel um fixeru ta tem mas di ki um alguem ki bu podi fazi download.
Bom ku kel teknologia li, fika rei di fasil partilha kualker tipo di fixeru. Sa ta usadu kel protokolu li pa fazi distribuison di Sistemas Operativu kompletu. Kuasi tudu distribuison di Linux sta disponivel komu um torrent. Ma també, é tem sufridu txeu kritika pamo el é utilizadu pa fazi distribuison di filmi, djogu, e musika piratiadu. Ma nha opinion é ki kel merkadu di pirataria li dja ta existiba antis di BitTorrent, i é ta bem kontinua ta existi enkuantu filmi, musika, djogu, prugramas ta kontinua ku disponibilidadi limitadu, e presus ki ka é pa tudu algem. Mi nta kredita ki si kes prudutu li ta dexa di ser interesanti pa pirataria dia ki es bira asesivel pa tudu skalon di salariu. Ma komu inda é ka sta, teknolodia ki ta fasilita ses distribuison é sempri um alvu pa kes empresa ki ta perdi ku pirataria.
Pamodi preson di kes empresa li, atravez di varius grupo di defesa di empresas (RIIA pa Musika, MPAA pa filmi, etc) txeu provedor tem stadu ta monitora, i em sertus kasu korta asesu a BitTorrent (BT), ta alega ki BT é semelhanti a virus, pa dsenkoraja usu di kel protokolu li. Klaru ki kela sirbi so pa xatia kes programador di BT. Nton programador decidi embuti na kel protocolu li, um opson di enkriptason, ki ta permitiu a usa BT mesmu si bu provedor blokeia BT normal, genial! (Klika na imagem pa odja um demonstrason)
BT é um protokolu ki sta resolvi um grandi problema na um mundu ki sta kada bez mas informatizadu, i ku local di trabadju kada bez mas dispoersu na mundu. Imagina bo é um arkitetu, i bu tem bus desenhu di AutoCad ki ta okupa serka di 100 MB i bu mesti mandal pa skritoriu na Genebre, Nova Iorki, Pekim, Praia, Mindelo, etc. Ki opson ki bu tem pa mandal? E-mail ka ta da, el é mutu grandi, na um CD bu tem ki mandal pa kureiu (kel di nos? sim tem ki ser) ou atxa um portador, enfim tudu alguen sabi difikuldadi ki nu tem di manda kusas pa fora.Ma usandu BT so bu ta informa kes alguen di bu IP, bu ta poi bu fixeru ta distribui i es ta consigui panhal. Tudu es! I si luz bai na bu kasa i dja bu konsigui fazi upload di kel fixeru kompletu, es ta konsigui tem bu fixeru kompletu, partlhandu entri es.
Agora, tem kel ladu di pirataria. Keli n ka sta bem da mutu splikason, so pa fla ki na CV é txeu difisil bu usal pamo BT é espendiosu em termus di download, pa um download di 200 MB bu podi gasta 400 MB di download, pamo natureza di kel protokolo. I dja nu sabi ki CVT ka ta purdua.
Ma si bu kre sprimenta, ou si bu tem um amigu ki ka tem problema ku download :) flal di kes prugrama li, i kes site li.

Klientis BitTorrent:
- µTorrent
- Azureus

Sites:
- The Pirate Bay
- BT Junkie
- Mininova
- TorrentSpy

- Bom Djogu!!

‎ Lé Mas!

Midjor Sistema Operativu du Mundu... Kel Martelu!

Bom keli já di partida é um asuntu xeiu di polemika pamo tem:
- Microsoft
- Apple
- Linux
- i otus menus konxedu.
E kada um di ses utilizador é mas ferenhu ki kel otu, menus Windows... kuriozu ki nunka n konxi um Fanatiku di Windows... Talvez só Steve Balmer :)
Ma mi nkre kaba ku kel polemika li, pamo pa mi, i pa kualker algem, kel midjor sistema operativu debia ser .... ta da da dam... nha martelu! As bez nha xavi fenda, as bez nha barbukim.
:) Konfusu? Xam Splika nton.
Um bez nta meteba na um monti diskuson di ki Sistema Operativu (SO) era realmenti midjor, ma diskuson ki ta da gerra propi. Ma oji, nsta mas kalmu pamo midjor SO é kel ti ta sirbi abó, é kel martelu pa prega kel pregu.

Nu bem djobi um kusa li... Kuse ki bo komu utilizador di um komputador ta nesesita? Si bu é advogadu, bu mesti um prosesador di textu, um browser di Internet, i poku mas. Si bu é Artista grafiku bu mesti um gestor di imagi, um prosesador di imagi, browser di internet, i mas algun kusinha pa desenhu grafiku, si bu é karpinteru bu mesti um folha di kalkulo, um broswer internet, i poku mas... i si bo é informatiku bu mesti, um browser internet, i tudu kusa mesmu si bu ka ta usal... :) i li ki ta kumesa prublema... ku informatiku.

Na kes izemplu kim da um kuza é konstanti; browser internet. Filizmenti tudu SO tem um, uns ki ta fazi keli ku kel otu, i otus ki ta fazi kel otu ku keli. :) Nu ta dexa gerra di browser pa otu artigu. Portantu, nes otika li, ka podi ser pa navegador internet ki nu ta decidi kal ki é midjor SO. Nton é modi ki nu odja kel midjor. Será atravez di bu programa di prosesador di textu? Microsoft tem Office, ma Apple també tem Office, i Linux tem OpenOffice, ma Microsoft i Apple també tem OpenOffice. Axu ki li també nu ka tem termo di komparason... otu bez diskuson di ki plataforma di "Office" tem ki fika pa otu artigu, li nu sta bem fala so di SO. Bom talvez, nu ta kompara na procesador di imagi; Microsoft e Apple tem PhotoShop, e Linux tem Gimp, ma Microsoft i Apple tambe tem Gimp. I si bu tiver paciencia i um licensa (hehehe) bu podi poi Photoshop ta roda na Linux. Otra bez ka tem base di komparason... Pamodi? Aparentimenti tudu ki sta disponivel em termus di tipo di prugrama sta disponivel na kualker SO. Nton modi ki bu ta diferensia kes SO?

Bom bu ta diferensia primeramenti na suporti di bu SO. Ou bu ta paga pa suporti, ou bu ka ta paga. Ou bu ta paga pa licensa ou bu ka ta paga. Si bu ka paga pa um ou otu normalmenti bo é um alguem korajoso i sabi ki bu sta bem tem oras ki bu sta bem sta ta da kabesa na paredi pamo algum kusa ka sta funciona, i si bu paga normalmenti bu ka tem prublema na atxa ajuda rapidu e professional ku bus prublema, ma nem sempri é verdadi. Linux é di grasa pa usa, ma normalmenti é tem um taxa maior di konfigurason, ma é tem um komunidadi rei di ativu portantu suporti é di grasa, ma nem sempri el é util, pamo tem um monti di verson di Linux. Ma na Linux si sistema sta funciona el é stremamenti stavel i é tem um grandi vantagi ki normalmenti el é ka alvu di virus. Apple (OS X) tambe é stavel, ma mas fasil di utiliza di tudu es pa um algem ki ka é informatiku i ki ka tem pasiensa pa sta ta djobi txeu blu, ma em termus di kustu e kel mas karu pamo el é ta roda só na hardware di Apple (Ma si bo é kuriosu. i bu teni txeu pasiensa bu podi pol ta roda na otus makina). Microsoft (Windows), e kel mas usadu na mundu, mais ou menus stavel, ma bu tem ki tem um anti-virus atualizadu pa maior stabilidadi. É tem um utilizason nau mutu komplikadu, i pa tel legalmenti bu mesti kumpra um licensa pa utilizason i suporti.

Oji em dia nem diferensa txeu ka tem em termus di makina, maior parti di sistema sta usa plataforma Intel, ki kualker di kes SO mais usadu podi ser instaladu, uns ku mas otus ku menus difikuldadi.
Resumindu, tudu kes sitema operativu ki n deskrevi li tem ses utilildade, na medida di nos necessidadi. Mi si mi é um karpinteru n mesti kumpra um martelu, nta kumpra kel ki n mesti, si é Linux, Microsoft, ou Apple ta dipendi di kel pregu ki n mesti martela. I klaru npodi tem um ki tem um punhu ergonomiku di boracha, ou kel ki é di madera ki ta pou kalu na mon dipos di um dia di usu.
Mi é ka bom izemplu di utilizador normal pamo nta usa tudu dia 1, 2, ou 3 SO diferenti. Kada um ku ses kusa k mim mesti, uns é bom pa uns kusa i mau pa otus. Ntem Linux na trabadju (desktop), Windows XP na nha portatil, i nsta djobi um Mac OSX pa kasa, i djan da konsedju pa uns x algem pa kumpra Mac. Tudu es, pa mi, ta funciona a mil maravilhas. Ami djam atxa nha martelu. A bo go... Bá djobi di bo! :)

-Bom djogu!!!

‎ Lé Mas!

Um Pausa...

Guentis nhos diskulpan... ma nka fazi updati di blog es tempu li. Kem ki konxem sabi ki nka fazel pa mal, ma pamo n tive  txeu okupadu ku otus kusa. Ma a partir des mes nu ta volta ku mas friki fraki eletroniku.

-- Bom Djogu...

‎ Lé Mas!

Sony vs. Hackers... Sony 0 - Hackers La ta bai!!

Inkrivel... modi ki alguns alguem ka ta prendi ku ses eru di passado.
Na anus 80 Sony saiba ku Betamax, nhos ta lembra? kes casetinhu di video ki tinha pa li na tera, undi ki es bai? Gosi caseti ki tem é so VHS. Ma nhos sabia ki kel teknologia di Betamax era mutu mas avansadu di ki di VHS? É tinha midjor kualidadi di imagem. Ma modi ki un kusa tao midjor ta dzaparsi i ta fika kel pior? Simples... Sony, donu di Betamax ka abri mon di kel teknologia, so es ki ta produziba kes gravador, otus empresa ka era permitidu fazes... es bem abri odju mutu mas tardi, kandu es odja ki VHS ki staba ta domina merkadu, ma lá dja staba tardi dimas.
Oji, na nova era di teknologia, kel senario sta ripiti otu bes, ku otu ekipamentu, ma di memu fabrikanti, Sony. Ma dez bez parcem ma um kumunidadi restritu di hackers sta luta kontra Sony pa "djudas" fazi ses produtu mas rentavel, i um midjor produtu na merkadu. Ma Sony ta rekusa odja kel filmi li, nem na Betamax :)
Modi??! Hackers sa ta djuda Sony?!!
Sim .... Dexam splika...

É si. Sony na 2004 lansa um consola di jogu portátil txomadu Playstation Portable (PSP). Kel consola li foi lansadu ku intenson di ser um ekipamentu ki ta fazeba un serie di kusas ku media em geral. El é:
1. Un konsola di jogu. Atravez di uns disku proprietário, txomadu UMD (Universal Media Disk)
2. Un tocador di MP3. Atravez di um karton di memoria bu ta poi bus mp3 a partir di um kabu USB di bu PC.
3. Un tocador di video. Keli també é atravez di um UMD.
4. Fotu. Atravez di bu karton di memoria bu podi poi bus fotu pa mostra amigus.
5. Na el tambe tem WiFi (ligason sen fiu) ki ta permitiu liga na Internet e djobi paginas etc.
Enfin, mutu bonitu. Sony go, usandu di vastu speriencia na merkadu dicidi ki, kes jogu ten ki ser so na UMD, kes video també so na UMD, i kes MP3 tinha ki ser kel verson di Sony (txomadu ATRAC MP3). Pamo? Otra bez? Klaru ki ses intenson é garanti ki tudu asesoriu di PSP ta passa pa es, portantu desenvolvedores di jogu ten ki passa pa es pes podi poi kes jogu na UMD, un formatu proprietáriu di Sony. Tudu distribuidora ki kre poi filmi na PSP ta passa pa es també, tem ki ser UMD. Li es sa ta perdi txeu, pamo distribuidoras sima Warner-Bros, ka ten nenhum filmi na UMD. So studios ligado a Sony ki tem filmi na UMD... Enfim, kel UMD li sta parsi kada bes mas ku Betamax di 1980.
Ma é ka tudu alguen ki odja kel PSP ku mesmu odju di Sony. Um grupo di hackers odja kel ekipamentu li komu muto mas ki Sony sta ta pretendi di el. Um pruduto transversal di entretinimentu. Jogu, video, musika, fotu, internet, i otus na um só plataforma... fixi. So um kusa, é teni un software fitxadu ki ka ta permitiu desenvolvi bus programa pa el. Ku kel restrison li, em pricipio, so bu podi fazi so kuse ki Sony ta dexau. Ma pa kes guentis li é um kusa kriminal.
Kes hacker kumesa ta da riba di kel software di PSP pa djobi vulnerabilidadi di software proprietariu di Sony. Uns semana dipos di PSP sai na merkadu, na primero verson di software (SW) di PSP, (verson 1.0) es atxa um manera di exekuta codigo "fetu dentu kasa" (na ingles "homebrew") riba kel di Sony. Logo abri un horizonti pa kel plataforma li. Keli kria fla ki tudu kes funcionalidadi ki Sony tinha metedu, i trankadu, na kel ekipamentu li staba finalmenti abertu pa explorason di programadoris "subversivus", na vista di Sony. Nton Sony examina ses codigo inicial i es fitxa kel "braku" ki v1.0 tinha i es fazi v1.5. Na mesma, uns dias dipos rapazis dal na txon otrabez, ma dez bez es kumesa emula UMD, ker dizer si bu tinha um jogu na UMD bu ta pasaba el pa bu karton di memoria i bu ta jugal sem kel UMD. Keli efetivamenti ta permitiba pirataria di tudu jogu di PSP. Ku Internet jogu di PSP kumesa ta parsi na sites di .torrent (proximo artigo) pa ser partilhadu. Sony fadiga, i kumesa ta lansa upgrade trás di upgrade na tentativa di fitxa tudu braku, ma sempri uns dias dipos rapaz ta atxa otu braku, kusas ta maria pa Sony. Sai v1.51, 1.52, 1.54. sai v.2.0. Sony kumesa ta abri alguns funcionalidadi ki es tinha fitxadu, es kumesa ta permiti Flash pa Web, WMV (Windows Media Video di Microsoft) pa musica i video, i mp3 generico. Tatika di Sony li foi di apazigua kexas di utilizadoris "normal" sobri restrison ki tinha na ses software original, Sony kumesa ta odja ki propi utilizadoris basiku sta ta atxa PSP mutu limitadu.
Ma hackers kria mas abertura, poku dias dipos di v2.0 sai es kria um programa ki ta rebaixa bu software pa v1.5, i kontinua ta desenvolvi kodigus "homebrew" pa v1.5. Oji em dia hackers dja txiga o pontu di emula un di kes verson (v3.03) mas avansadu di Sony dentu di um verson hackiadu, ker dizer, tudo ki verson oficial ta dau mas tudu ki kumunidadi "homebrew" ta dau també. Portantu midjor di tudu dos mundo.
Desdi primeru lansamentu di PSP hackers sta tenta abri kel plataforma di PSP pa tudu tipo di software, desdi djogu, video, musika internet, kes ki Sony tevi intenson di fazi di ses manera, ate plataforma di ditribuison di video (pimpStreamer), Joystick di bu PC (WiFI Controller), Klienti GPS, Caderno de Notas portatil, Emulador di otus plataforma di djogu (Nintendo, Sega, MaME, Atari, Super Nintendo, ti Playstation 1!!).
Pa nos li na tera, um PSP bali pena tem, si bu konsigui hackial, pamo kes UMD ka ten na merkadu li, i es é karu (cerca di 3 - 5 bala pa kada djogu ou filmi). Si bu ten um ki dja foi batizadu pa um hacker bu tem so limitason di spasu na bu karton di memoria i bu konta di CVT pa download, pamo o restu sta tudu disponivel na Internet. Teni djogus di grasa (pirataria klaru), filmis, musica. Na materia di djogu es tem di kes midjor, tantu pa individual ma pa familias pa djuga djuntu ku 2 ou mas PSP.
Na nha opinion Sony sa ta perdi un grandi oportunidadi di marka pontus na merkadu ku um produtu stremamenti versatil, é ta peka pa tenta kontrola tudu faseta di se produtu, mesmu ku iniciativas di midjoral pa otus usu.
... bom djogu!

‎ Lé Mas!

Kel Telemovel...

Dja tem uns tempu, n abri net i nda ku uns artigo ta papia di um telemovel ki sta pa saiba di Apple, iPhone. Ma na altura ninguem ka sabia kuse ki kel telemovel li ta fazeba, inklusivi, tinha meio mundo ta submeti ses opinion di modi ki kel telemovel li ta serba, kantu memoria, ku fotu, sem fotu, video, enfim spekulason generalizadu. Imagina ki kes guentis li passa tempu a seriu ta kria ses intrepetason artistiku di kusé ki Apple sta ta fazeba. Apple nem ka das satisfason di fla si realmenti tinha um produtu ki txomaba iPhone. É das so pa dodu. Klaru ki kela so intensifika kuriosidadi. Ma nu ta pergunta pamo ki tinha tudu es bram bram sobri um telemovel? Pamo ki tudo kritiku, blog, artigo di teknologia ka ta paraba di papia di um movel, ki nem kenha ki supostamenti sta ta produzil, ka ta papiaba nel? N ta lembra na kel altura, n ba site di Apple i n fazi um peskisa pa iPhone, ka parsi um artigo... nada. Razon di tudu kel spekulason li era dos kusa:
1. Pamo Apple dja tem uns anu ta prometi algun kusa portatil i transversal, ker dizer, ki ta djunta txeu kusa na um. Ka nu skesi ki Apple dja dura nes jogu di marketing, pa sukundi fuga diinformason di ses produto, djes ba ti tribunal i dispidi funsionariu pamodi papiada txeu sobri um produto.
2. Pamo nos propi nu sta djobi kel produto ki ta bem djunta tudu kuse ki na ta usa oji em dia, nu kre email na rua, papia na rua, tra fotinhu, surfa na net, mantem em kontatu ku amigus, familia, trabadju, obi musika, odja filmi, partilha tokis, enfim tudu. Nton tudu alguem ta fika ta kria se iPhone. Modi ki é ta serba.
Ma ti oji bo ta podi fazi kes kusa li ma na ekipamentus diferenti, alguns bu ta konsiguiba djunta, ma ka tudu. Un frustrason di txeu... di mi pelo menus :). Oji em dia, ku kusas ta bira kada bes mas pikinoti, nu tem ki kumesa ta odja ki tem ki ser possivel djunta tudu kes kusa ki nu ta fazi ku teknologia, na um produto só.
Bom, Apple es mes li é anunsia iPhone, i pessoal keli é nha telemovel! El é um iPod Video, ku tamanho un kuzinha mas grandi di iPod Nano, klienti di e-mail, klienti di web (Safari), Sistema Operativo (Mini-OS X), makina di fotu (2 Megapixel) ahn e ta txoma tambe. Ma pera si, djam obi guentis ta fla dja, ma kela dja teni, Nokia NYXZ (Meti bu modelu li) dja ta fazi kela, Samsung XPTO ta fazi kela tambe, Motorola Vxxxxxzxz tambe. Nhos tem razon, ma tem um grandi diferensa entri iPhone i o restu. Kal ki eh diferensa? Bolsa dja odjal... tanto ki kel dia dipos di anunsio di Apple ses stok subi drastikamenti, e do kes otu kai mas baxu inda. Razon eh simples, e expansibilidadi. Apple sa ta trazi se Sistema Operativo pa dentu di iPhone, keli kre fla ki tudu ki oji ta kori na OS X (Sistema Operativo proprietário di Apple) na um Mac oji sta bem kori na iPhone, ker dizer, experiensia di utilizador na iPhone sta bem ser identiku a usa um komputador na kasa, kes memo prugrama, kes mesmu site, mesmu email sen tem ki prendi kusas novo. Problema di kes otu, é ki es ka é empresas diresionadu a fazi sistema operativu, es ta kria software pa telemovel, i es ta adisiona funsionalidadi tipo web, musika, photo. Por exemplo, tenta asedi um site ki tem Flash na el ku un di kes ekipamentu di Nokia. Eh ka ta da. Bom, ke li é so um parti di ekuason, pamo tem tanbe kes movel di QTek ki ta usa Windows Mobile, kes li tambe ten grandi potensial di integra tudu ki é digital na un so plataforma. É tem kes mesmu vantagi di iPhone ma so ki li es ta perdi pa design, i fasilidadi di usu. Em partikular kel parti di video i musica, iPhone sta bem usa kel interface di iPod i iTunes, ku biblioteka intuitivu, etc, enkuantu ki Windows tem windows Portable Media player ki ka tem kel fusionalidadi di biblioteka. iPhone tem um interfasi ki ka ta dependi di kanetinha ou tekladu di plastiku pa introduzi dados, é ta usa um tekladu na ekran ki é stremamenti simples di usa. iPhone ta usa tambe kombinason di toki ku dedu ki ta fasilitau interason ku se sistema operativu. Enfim Apple konsigi, aparentimenti, konsilia tudu na um pakoti basofu, finu, intuitivo i util.
Agora keston agora é si bali pena tenel li na tera. Bom... sin! Si bu podi ku el (50-60 bala)! I si bu sabi tambe ki bu ka sta bem usa tudu se potensial. iPhone tem kapasidadi di liga na Internet atravez di Wi-Fi e atraves di EDGE (Um teknologia avansadu di ligason atravez di redi telemovel) ki CVT nem ka sta papia nel inda, so pa dau um idea so gossi ki CVT sta testa GPRS. portantu um aspetu ki nos li na tera nu ka sta bem konsigi usa gossi é internet atravez di redi movel di CVT... :(
Bom até kusa sai nsta li ta speral... sima nfla... "pesual keli é nha movel" si n atxau ku el pistan... :)

...Bom djogu!!!

‎ Lé Mas!

Primeru Post

É Modi pessoal, benvindu a nha blog dedikadu a triki-traki eletroniku, djogu, teknologia em geral. Ness blog li n tem intenson di da nha opinion, klaru, na kuse ki sta na merkadu gossi li, i kuse ki sta bem sta i modi ki nu podi utilizal, i si vale a pena usal li na nos CV, ki as bes, é ka midjor kau di tem topu di gama di alguns kusa. (por exemplo, movel ki ta transmiti video --- obrigada CVT:P) Li tambe nta bem tenta trata alguns keston di politica ki ta afeta nos sociedadi na vertenti di teknolojia.
Um a parti, kel blog li sta bem ser tudu na kriolu, i nsta bem tenta usa ALUPEC pa spressa. Ma komu inda kusas ka sta difinidu dretu, nu ta ba ta da uns eru li ku la, si n odjas, nta koriji, sinau bu ta korijin es... :)

- Bom djogu...

‎ Lé Mas!